8.10.08

Trasmissiones RAI in sardu

Ite nde pessades de sas trasmissiones de 30 min chi est faghende sa RAI 3 bias sa chida? Chie las at intesas, a nos podet informare comente sunt fatas, chie bi leat parte.
Deo apo intesu sa de oe (8-10-2008) e mi paret fata comente si podiat fàghere 10 o 15 annos a como, una trasmissione culturalista, chi non tenet contu de totu su dibàtidu de custos ùrtimos annos, de sas initziativas e de sas prospetivas, mescamente a pustis de sa 482/99.

Diegu Corràine

10 commenti:

Anonimo ha detto...

salude a totus, apo lèziu cun praghere sos pagos foeddos de Diegu subra sa chistione de sa RAI e potzo nàrrere chi mi nde at furadu sos foeddos de buca. Diat a èssere pretzisu a nde chistionare ca s'ùrtima cosa chi serbiat in custu momentu fiant trasmissiones ancora ligadas a cussu modu de pentzare...

uls.sar.ogiastra ha detto...

Tore, pro sighire cun s'arresonu, custas mi parent sas trasmissiones chi, forsis (ma forsis, naro) sa RAI deviat o podiat fàghere 30 annos a como, E NO AT FATU.
Ma como nono, devet propònnere una cara noa de sa limba, chi currispondat a sa gana e a sas possibilidades de ufitzialidade chi su sardu tenet como, mescamente a pustis de sa 482/99.
Sa RAI diat dèvere una parte de sa polìtica lingìstica nostra, non s'isprigu de su tempus coladu.
TENIMUS BISÒNGIU DE TEMPUS BENIDORE!

Otieresu ha detto...

Su Lunis faghent "A disora", su mèrcuris "Deo, Zeo, Jeo..". Las apo intesas ambas duas. Sa cosa de bonu est chi faeddant in sardu. Bella s'idea de acostagiare unu chi allegat sardu meridionale cun unu chi manìgiat su de Vitzi: si cumprendent a pare, sena duda. Ma nd'essit a pìgiu, pro su chi pertocat sa sustàntzia, unu sardu galu de "intragnas", de contos de foghile, contados e paristòrias, de poesia a bolu e tzilleri. E nois peleende pro tradùere atos giurìdicos e amministrativos e pro dare prus visibilidade e modernidade a sa limba:àsiu nd'amus si bi la sighint gasi! No est totu de nche fuliare, ca b'at cosas de balia. Ma s'antigòriu mi paret chi carràrgiet sos tempos reghentes. Cristiano Becciu

Bobore Bussa-Massajos ha detto...

Diat èssere interessante chi chie s'ocupat de sa programmatzione mutat fintzas chie traballat puru cada die cun sa limba, a manera chi sa gente cumprendat chi no esistit petzi sa limba de su fochile.
Non si podet iscriere a sa redatzione?
Saludos
Bobore Bussa

Anonimo ha detto...

Custa initziativa tua est de importu meda, poita permittit interventus informalis e lestus. No apu intendiu nudda in sa Radiu, mi parrit orariu feti po massaias e pensionaus, cun rispettu fueddendi. Est berus ca intendi chistionai in sardu in sa RAI est giai unu signali positivu. Tenit arrexoni Tori (cunvegnu de oi in Aristanis) ca cumbenit donai a sa RAI o chini bolla chi siat, i programmas giai cunfetzionaus de genti chi operat in su campu limbisticu de meda e chi no si improvisat oi espertu de cosas sardas. Tenis arrexoni tui, serbit visibilitadi po sa limba... chi andu in Corsica cumprendu luegu ca seu in una terra bilingue, innoi c'est puru sa bregungia ca medas Comunus no anti deliberau sa delimitatzioni de minoranza limbistica, medas bortas custu est feti po ignorantzia de is amministratoris (m'est cuntessiu cun unu Comunu "insospettabili"... eppuru no ddu scidiant!). Iat a toccai a fai opera de "tutoradu" po fintzas cun is Comunus non tutelaus (po nai: si iat a podi delimitai puru is comunus Galluresus, Carloforte e Calasetta, comenti a minoranza sarda... Unu xoberu politicu comenti a "sa multiplica" dei is Comunus valser). No mi frimu immoi a spiegai s'arrexioni, ma creu chi siat implicita. Mi parit chi siaus camminendi a passu de fromiga. Medas cosas si faint e abarrant me is cadaxius: Si funti fattus studius a pitzu de sa toponomastica... ndi d'obeus bogai de is cartinas custu "Mal di ventre", "Golfo Aranci", "Costa smeralda", "Costa d'oro" e totus is atrus caboris? Funti giai bessendi articulus chi difendint custus toponimus... A mari!!! Saludi e trigu, Massimu Pistis

dsc ha detto...

Màssimu
—a s'ischit cales sunt sas comunas chi no ant deliberadu mai pro sa 482?
—sa lege 482 reconnoschet petzi sardu e catalanu, sa 26/97 finas sas ateras limbas de Sardigna.
Non podimus (e non cumbenit) cunfùndere sas cosas: si pro sa 26 Gadduresu, tabarchimu e tataresu sunt limbas diferentes (e duncas tuteladas comente minorias internas de sa Sardigna) no las podimus presentare comente "variedades" de sa limba sarda! O una cosa o s'àtera!

[Diegu Corràine]

Ufìtziu limba sarda - Comunes de Planàrgia e Montiferru otzidentale ha detto...

Deo custas trasmissiones non las apo intesas, e duncas non potzo nàrrere ne bene e ne male. S'idea chi m'apo fatu in generale, però, est chi b'at un'"iscollamentu" intre sa limba sarda e sa vida. M'ispiego: mi paret inùtile a sìghere a pistare subra de sas traditziones e de sos contos de foghile cando sos giòvanos sunt interessados a trasmissiones de intratenimentu, de mùsica, de variedade... No est chi sas traditziones non sunt importantes, ANTZIS!, però si cherimus avicinare sa limba a sa gente (in manera particulare a sa gioventude chi non la faeddat) tocat de lis faeddare de su chi lis interessat.
Si nono faghimus a sa moda de cussu chi aiat pèrdidu sas craes de domo in mesu s'istrada ma las chircaiat in suta su lampione ca li fiat prus còmodu ca bi fiat sa lughe. Non funtzionant gasi sas cosas...
Saludos dae Gianfranca Piras

Unknown ha detto...

Salude,
mi paret ca pro is chi sunt faghende sas trasmissiones siat meda prus lestru a nde pesare unu programma stile "s'arrejonada" ca unu bandat cue, si setzet e allegat ebbia, cunforma a resèssere a ordimingiare unu programma bene fatu de cuntenutos modernos. Ca pro fàghere custu bolet informatzione, issèberos, ma mascamente cussièntzia de àere in manos una limba de su pòpulu chi est bivende imoe. Prus làdinu a allegare de su tempus coladu.
Sa cosa mègius diat èssere a iscrìere una lìtera a sa ràdio. Serbit peroe a nde ischire de prus, deo nd'apo intèndiu pagu e nudda de is trasmissiones.

Est de importu, comente fiat narende peri Franca, a nàrrere cosa chi serbit a sa gente, a ue andare a fàghere viàgios, informatziones pro bìvere mègius sa sotziedade nostra, e gasi. Custu desafiu ddu binchimus petzi chi atzunghimus unu serbìtziu in prus, paris a sa limba.

Anonimo ha detto...

Saludi a totus,
deu seu arribau innoi sighendi unu link.
Is trasmissionis in sardu de radio-sardegna ddas seu sighendi pagu po mori ca ddas donant in ora chi no mi benit a beni.
Sa trasmissioni de su 8.10.08, de chi est partia custa arrexonada, s'agatat in s'arretza, po chini dda bollat ascurtai:

http://media-mobi.com/en/?play-1bost0w0loy1fkrotfngt91jglgdb3qg

Deu dd'apu intendia prima de intrai a innoi e depu nai ca mi fiat praxa.
Ligendi custus cumentus mi parit ndi bessat una visioni unu pagu tropu negativa.

Ei, est una trasmissioni "culturalista",
ma m'est parta beni fata e interessanti. Prima de totu po sa cumpetèntzia de presentadoris e ospitis.
De interèssiu meda innui s'est fueddau de educatzioni bilingui de is fillus in tempus de oi, chi fiat s'argumentu printzipali. (M'arregordu un'atra trasmissioni interessanti e arrennèscia beni innui a chistionai de custas cosas fiant Pepi Corongiu e Antonellu Garau).
S'est chistionau puru de s'imperu de su sardu in is professionis modernas.
A s'acabu de poesia orali, ma in manera non conventzionali. Ita bolit nai? Ca fait a chistionai in manera moderna de argumentus traditzionalis puru.

S'arrexonada m'est partu chi apat aguantau unu livellu artu e unu bellu ritmu po totu sa longària cosa sua.
E in sustàntzia is argumentus no mi funt partus aici scapiaus de su mundu e de sa vida de oi.
Est berus ca su sardu fait a tocat a dd'imperai po atru e in atru modu puru, ca depit essi normali a ddu fai,e puru po cambiai in mellus sa percetzioni chi ndi ddi tenit sa genti.
Tretu de fai nci nd'at meda.
No si scaresciaus perou ca faint giai diarius-radiu in paricis emitentis.
No siais aici severus!

Marco Pisano

Anonimo ha detto...

Ei Diego, giustu! Teneus contu assumancu de una cittadi comenti a Tatari, anca su sardu megat a torrai con s'immigratzioi de "li sardi"...
Seu interessau a fai pati de su Comitau. Chi ténis un elencu de is comunus de s'oristanesu de jossu chi no anti delimitau su territoriu comenti a miniranza sarda, mandamiddu, m'impegnu a intendi is sindigus.
Saludi, Massimo.

massimo.pistis@tiscali.it